साहित्य(कबिता, कथा, लेख) NEWS

नयाँ बर्षको उपलक्षमा-” सिमाना कटाउने बेला हो यो”।

Published by Hamrosamaj on December 31, 2009

हरिहर दाहाल,क्यालिफोर्निया

नयाँ बर्षको उपलक्षमा- कबिता-सिमाना कटाउने बेला हो यो।

गाउ, शहर र बस्तीहरु
अनाधिक्रित रुपमा मिचिएको बेला हो यो।
बुद्धी नभएका स्वाँठ भुसतिघ्रेहरुबाट
निर्बलहरु किचिएको बेला हो यो।

घरभित्र चोर छिरेको खुशीयालिमा
सर्बस्व लुटिदा पनि
सर्बाङ नाँचिएको बेला हो यो।
षोशणको पनि हद हुन्छ
सहनशिलताको सिमा जाँचिएको बेला हो यो।

एता ट्रुक्र्याएर, उता भत्काएर
बिकासका नाममा
बिनास रोपिएको बेला हो यो।
यता मारेर, उता चिथोरेर
उपचारका नाममा
बिषमय सुई घोपिएको बेला हो यो।

उन्मुक्तिको सपना बाँडेर
बाँच्न पाउने अधिकार खोसिएर
स्वतन्त्रताका नाममा
निरंकुसता लादिएको बेला हो यो।
बोल्न-गर्न क्यै नदिएर
देश र जनतालाई दलदलमा
खाँदिएको बेला हो यो।

जाती, भाषी र छेत्रीयताका नाममा
एक-अर्कामा सत्रुता बढाईएको बेला हो यो।
सँबन्ध र नाताहरु टुक्र्याईएर
मानबताको धज्जी उडाईएको बेला हो यो।

घर, परिवार, इस्टमित्र र छिमेकिका बिच
गौरबमय आत्मियतामा
फाटो हालिएको बेला हो यो।
भाई-भाई फुटाएर देश टुक्र्याउने
षड्यन्त्रको जालो फालिएको बेला हो यो।

भाँडहरुबाट होसियार है हजुर!

स्वाबलम्बी ,पौरखी र इमान्दार
नेपाली -नेपालिका बिच
बैमनष्यता ,शत्रुता र तिक्तता हटाउने बेला हो यो।
देश टुक्र्याउने पाखण्डीहरुलाई
जुत्ताको माला पहिराई
सिमाना कटाउने बेला हो यो।