साहित्य(कबिता, कथा, लेख) NEWS

(कबिता ) “आँखाको पर्याय घुँघुरु ” -आचार्य प्रभा

Published by Hamrosamaj on February 3, 2010

(कबिता ) “आँखाको पर्याय घुँघुरु “ आचार्य प्रभा

हरेक रात सपना देख्ने आँखा
अचेल मौनतासँग आफुलाई
साटिरहेछ,
खै किन हो कुन्नी ?
झप्कन पटक्क मान्दैन
बरु अँधेरीसँग टोल्हाइरहन्छ
अन्धकार सन्नाटासंग
आफ्नो दुखेसो पोखाइरहन्छ
त र अफ्सोच !
रात स्वार्थी बनेर उस्कै नीरिहताको
चीर हरण गर्छ र
आफु बिहानीलाई अंगाल्न पुग्छ
कठै!यो नीरिह आँखा
नर्तकीको पयरको घुँघुरु झैं
कहिले रातको पैतालामा
कहिले दिनको पैतालामा
कठ्पुतली झैं नाच्न
वाध्य हुन्छ ।
आखिर आँखा भन्नु नै
आसुँको दह हो,
जो हर पल डुबिरहन्छ
ब्यथाको सागरमा
त्यसैले त उसलाई
नत रातले आफ्नो अँध्यारोमा
चुमेर लुकाउन चाहन्छ
न त दिनले उज्यालोमा
सजाउन चाहन्छ ,
बस उ पयरको घुँघुरु झै
साटिइ रहन्छ
रात र दिनको पयरहरुमा ।